ኣብ ስደት ንዝርከቡ ኤርትራውያን መንእሰያት፡ ኣድላዪ ሞያዊ ስልጠናታት ብምሃብ ከምኡ’ውን ዕድል ስራሕ ብምፍጣር ህይወቶም ንኽመርሑ ንሰርሕ።
ብፍልጠት ዝተሃንጸ : ገዛእርእሱ ዝኸኣለ ኣፍራዪ ዜጋ ምምልማል።
ንሕብረተሰብና ካብ ሎሚ ጽባሕ ዝሕሸሉ ባይታ ብፍልጠት ዝሰረቱ ሞያዊ ስልጠናታት አንዳሃብና ነዳሉ።
ካቢ ብቋንቋ ብሌን ኮይኑ፡ ትርጉሙ ድማ "ሓግዝ" እዩ።
እዞም ነዚ ሰናይ ሓሳባት ዘበገስና ብኸቢድ መስገድል ናይ ስደት ሓሊፍና ሎሚ ኣብ ጹቡቕ መነባብሮ ዘለና ግዱሳት ኤርትራውያን ኢና። ነቲ ንሕና ዝሓለፍናዮ ከቢድ ጉዕዞን ዝኸሰርናዮ ግዜን እዞም ድሕሬና ዘለዉ ኣሕዋትናን ኣሓትናን ከይደግሙዎ ብዓቢኡ ፤ እንተ ሓመቀ ካብዚ በጺሕናዮ ዘለና ደረጃ ክጅምሩ ብምባል ዝጀሚርናዮ እዩ።
ሞያ ንኸጥርዩ ንዝደልዩ፡ ዕድል ስራሕ ክረኽቡሉ ብዝኽእሉ ዝተጸንዐ ሞያዊ ስልጠናታት ንህብ።
ክልሰሓሰባዊ ትምህርቲ ንዝቐሰሙ ፤ ተግበራዊ ስልጠናታት ብምዕጣቕ ንስራሕ ድልዋት ከም ዝኾኑ ንገብር።
ነቶም ኣቐዲምና ዘሰልጠንናዮምን ዘዕጠቕናዮምን ናይ ስራሕ መድረኽ ብምፍጣር ነውፍር።
ካቢ፡ ንዂሉ ኣብ ስደት ብፍላይ ድማ ኣብ ምብራቅ ኣፍሪቃ ንዝርከቡ ኣሕዋትን ኣሓትን ብፍልጠት ዝተሰነየ ሞያዊ ክእለት ከጥርዩ ንዝደልዩ ማዕጾና ክፉት እዩ።
ድሌትካ ኣንጺርካ ንምፍላጥ ዘኽእል ዕማማትና እዩ። ንዂሉ፡ ድሌት ፍልጠትን፣ ዕቤት ንለውጥን ንዘለዎ ሰብ ንቕበል።
ነቶም ዝምባሌታቶም ዘየለለዩ፤ ዝምባሌታቶም ንምልላይ ንሕግዝ።
ክልሰሓሰባዊ ትምህርቲ ጥራይ ዘሎዎም፥ ኣብ ግብራዊ ስራሕ ብምዉፋር ተመክሮኦም ዘዕብዩሉ ባይታ ንፈጥር።
ብዘለዎም ዉህሉል ፍልጠትን ተመክሮን ተጠቂሞም፤ ህይወቶም ንኽመርሑ ናብ ስራሕ ዓለም ነዋፍር።
እቲ ዝካየድ መደባት፡ ነቶም ኣብ ዝተፈላለየ ከባቢታት ከም ስደተኛታት ኮይኖም ንዝነበሩ ዘለው፣ ኣብ ዘለውዎ ሃገራት ዝውሃብ እዩ። እዚ ስልጠናታት፡ ኣብ ዕዳጋታት ዓለም ምስ ዘሎ ጠለባት ሞያን ስራሕን፡ ኣብ ግምት ብምእታው፡ ተጠቀምቲ እዚ ዕድላት፣ ዝሓሸ ተወዳዳሪ ሞያዊ ዕድላት ንክረኽቡ ብዘኽእሎም መገዲ ዝተዳለወ እዩ።
ኣብ ሚያዝያ ሓደ 2018፡ ኣብ ካርቱም ሱዳን፣ ብንኡስ ዓቕሚ ብዓሰርተ ክልተ ተማሃሮ፡ ብናይ ምምዕባል ዋሓዚ ገጻት ከምኡ ውን ረቂቕ ኣምራት ኮምፒዩተር ስልጠናታት ኣብ ኣሕዳሪ ቤት ትምህርቲ ብምሃብ ጀሚርና።
ኣብ ነሓሰ 2018 ድሕሪ ናይ ሽድሸተ ወርሒ ጹዑቕ ስልጠና፤ ቀዳማይ ዙሪያ ስልጠና ብዓወት ዛዚምና። እዞም ዓሰርተ ክልተ ሰልጠንቲ ኣብ ዝቐጸለ መደብ ስልጠና ከም ተሓጋገዝቲ መማህራን ኣሳቲፍና።
ኣብ ሕዳር 2018 2ይ ዙር ተወሳኺ ናይ ጽርበት ሓጺንን ዕንጸይትን ሞያዊ ስልጠና ብምውሳኽ ምስ ብርክት ዝበሉ ሰልጠንቲ ጀሚርና። ኣብ ለካቲት 2019 ድማ ብጠቕላላ ን148 ተማሃሮ ብዝተፈላለዩ ሞያዊ ስልጠናታት ኣመሪቕና።
መደብና ብምስፋሕ ኣብ ዝተፈላለዩ ከባቢታት ካርቱም ጨንፈር ብምኽፋት ንልዕሊ 650 ተማሃሮ ሒዝና ተወሳኺ ናይ ቋንቋ እንግሊዘኛ ስልጠና ብምትእትታው መደብና ቀጺልና።
ኣባላትና ብቑጽሪ ብርክት ዝበሉ ኮይኑም ኣብ ሱዳን፡ ኢትዮጵያ፡ ኡጋንዳ፡ ጀርመን፥ ፊንላንድ፥ ጥሊያን ዝርከቡ`ዮም።
ኣብዚ እዋን'ዚ መስርሕ ስልጠና ብሰንኪ ለበዳ ኮሮና ቫይረስ ደው ኢሉ እኳ እንተሃለወ ፤ ካቢ ብውሽጣዊ ምልመላ ዓቕሞም ዝደለቡ ኣባላት ኣቚምና ናይ ሞባይል ረቂቕ ኣምራትን/ፍርያትን (Mobile applications) ከምኡ ውን ዋሓዚ ገጻት (Web applications) ኣብ ምምዕባል ንርከብ ኣለና።
